Александр Евстифеев паша дене Советский районыш миен
Кодшо арня мучашыште республикым вуйлатыше Александр Евстифеев паша визит дене Советский районыш миен. Амалже икмыняре лийын. Муниципал образованийын лӱмгечыже да верысе калыкын тӱҥалтышыже почеш шыҥдарыме проект- влакым ончен лекмаш. Эн ончыч Александр Евстифеев Роҥго селашке миен. Тушто «Оласе йӧнан кумдыкым ыштымаш» программе почеш Кугу Ачамланде сарыште вуйыштым пыштыше да верласе сарлаште лийше- влаклан чапкӱм тӱзландарымаш кая. Мемориалыш сеҥыше салтакын скультптурыжо, Роҥго кундем гыч сарыште вуйым пыштыше 501 еҥын лӱмжым возыман мемориал оҥа пурат. Тошто стелым кораҥдыме да уым ыштыме, салтак скульптурым арален кодаш лийме да тудым уэмдаш тӱҥалыт. Район администрацийым вуйлатыше Антон Трудиновын мутшо почеш, мемориал кумдыкымат тӱзландарыме, тений тиде пашам умбакыже шуйымо лиеш. Шарнымаш скверыште кугу паша вуча. Тиде сомыллан ик миллион утла теҥгем ойырымо. Тиддеч посна верысе тӱҥалтышлан полшымо программе почеш 700 тӱжем теҥгем кучылтмо лиеш. Верысе калык уэмдыме пашам моткоч кумылын вашлийын. Тиде кечынак Республикым вуйлатыше район рӱдыштӧ стадионым чоҥышаш верыште лийын. Кызыт тудлан проект-смета документаций ямде, кум гектар кумдык мландым ойырымо. Александр Евстифеев тыгак районлан 85 ий темме лӱмеш пайрем мероприятийыш миен. Тудо районым вияҥдымашке промышленник, чоҥышо да амалкалче- влакын пыштыме надырыштым палемден да районысо аграрий- влакын сеҥымашыштым ушештарен. Куд ий жапыште районышто калыкле проект- влакым шыҥдараш кок миллиардат 700 миллион теҥгем ойырымо лиеш. Верысе калыклан Глава улан илышым, порылыкым, тыныслыкым да келшен илымашым, районлан вияҥмашым да пеледмашым тыланен. Вара ойыртемалтше еҥ- влаклан наградым кучыктымо. «Марий Эл тӱвыран сулло пашаеҥже» лӱмым Районысо тӱвыра пӧртын кружокшым вуйлатыше Галина Щербаковалан, «Марий Эл образованийын сулло пашаеҥже» Чап лӱмым Вечын кыдалаш школын туныктышыжо Тамара Шабалиналан пуымо. Тыгак икмыняр еҥлан Республикысе правительствын Чап грамотыжым да Республикым вуйлатышын тауштымашыжым кучыктымо.