Российын Геройжо Сергей Иштугановлан Почёт оҥам вераҥденыт

            Марий Турекысе кыдалаш школышто Российын Геройжо Сергей Иштугановлан Почёт оҥам вераҥденыт. Тудым почмылан пӧлеклалтше торжественный линейкыште Марий Элым вуйлатыше Юрий Зайцев участвоватлен. Кызыт Сергей Иштуганов Россий Армий радамыште службым умбакыже эрта, патырлын воин порысшым шукта. Кодшо ийын декабрьыште Российын Президентше Владимир Путин Кугу Кремль Полатын Георгиевский залыштыже Сергей Иштугановлан геройло подвигым ыштымылан кугыжаныш да калык ончылно надырлан Геройын Шӱдыржым кучыктен. Регионым вуйлатыше Российын Геройжо дене вашлиймыже нерген ойлен да тыгай патриот- влаклан кӧра армий да кугу элна вияҥеш манын. Ме тудын дене ятыр мутланышна, манын Юрий Зайцев. Тиде- шокшо точко- влакым эртыше достойный офицер да чын герой. Кугун тунемше, келге шинчымашан, ятыр историй фактым палыше еҥ. Тыгай еҥ- влаклан кӧра Россий чыла нелылыкымат эрта да сеҥымашыш шуэш,- каласен республикым вуйлатыше. Юрий Зайцев Сергей Иштугановын аваже Лариса Васильевна, ача лийшыже Валерий Алексеевичлан достойный офицерым, Российын чын патриотшым куштымыштлан таум каласен.
             Фото: Марий Элым вуйлатышын  администрацийжын увер дене пашам ыштыше пӧлкаже.