«Марий теле» фестиваль тӱҥалеш

             «Марий теле» фестиваль тӱҥалеш. Тудо тений 9-ше декабрь гыч шушаш ийын 25-ше февраль марте шуйна. Проектым Марий Элым вуйлатыше Юрий Зайцевын тӱҥалтышыже почеш шыҥдарат. Мероприятий- влак арня еда кугарня гыч рушараня марте урем площадкылаштат, тӱвыра тӧнежлаштат эртат. Эн шуко мероприятий Йошкар-Олаште лийшаш. Оласе чыла гаяк тӱҥ площадке- влак ушнат- Патриарший площадь, Брюгге сер, «Республикын да Шнуй Дева Мариян площадьше», Рӱдӧ каныме парк, Сеҥымаш парк, Тазалык аллей, виш каток- влак- чылаже 30 наре вер. Фестиваль 9-ше декабрьыште Эрик Сапаев лӱмеш опера да балет театрыште «Война и мир» балетын премьерыже дене почылтеш. У ий пайрем кечылаште мероприятий- влак тыгак Ленин площадьыште, Чавайн бульварыште, Россий Армийын тӱвыра полаште воктелсе площадкыште, Чарла Кремльыште да оласе полатлаште лийыт. Фестивальым эртарымашке театр, тӱвыра полат, книгагудо, тоштер, парк ден спорт сооружений- влак ушнат. Каныме тӱҥ мероприятий- влак- марла куштымаш, концерт да каныме мероприятий, театр постановко, йоча мероприятий да кас дискотека, рошто программе лийыт. Йӱштӧ Кугыза да Лумӱдыр дене фотопрогулко, спорт мероприятий- влак лийыт. «Марий теле» поектыш аниматор, вокалист, бизнес- сообществым оҥай проект- влак дене ушнаш ӱжыт. Ончыкылык каныш кечылан афише кажне кугарнян тӱвыра министерствын сайтыштыже да ведомствын социал вотлаштыже савыкталташ тӱҥалеш.
           Фото:  Тӱвыра министерстве.