Игече утларак да утларак йӱкшемда

          Игече утларак да утларак йӱкшемда. Идалык еда йӱштӧ жапыште ача-ава- влакым ик йодыш авалта: чот йӱштыштӧ йоча- влак дене кузе лияш? Техрегламент дене пайдаланен Йошкар-Оласе туныктыш виктем ача-ава- влаклан уверым ушештара. 25 градус да утларак йӱштӧ годым икымше гыч 4-ше класс марте, 28 градус да утларак годым 5 гыч 8-ше класс марте, 30 градус да утларак йӱштӧ годым 9 гыч 11-ше класс марте йоча- влаклан школыш мияш ок темлалт. Тидын годымак келшыдыме игече годым школ- влак  пеҥгыдемдыме режим почеш пашам ыштат, кеч- мыняр йоча толеш гынат, урокым эртарышаш да класслаште шокшым ситарышаш улыт. Ача-ава- влак йӱштӧ годым йочам школыш колташ, але мӧҥгыштӧ кодаш- шкевуя решенийым луктыт. Йоча мӧҥгыштӧ кодеш гын, ача-ава- влак тидын нерген класс вуйлатышылан шижтарышаш улыт. Икшывым школыш колташ кутырен келшыме гын, ача-ава- влак йочам школыш ужатен мийышаш да вара тудым вашлийшаш улыт.