Пасу пашаеҥ- влак чыла сомылым иканаште рӱж шуктат

Республикысе озанлыклаште кургым шапашлымаш умбакыже шуйна. Теҥгечысе кечылан шотлымаште 37 тӱжем тонн шудым ыштыме. Тидыже планын 77 процентше лиеш, сенажым 93 тӱжем тонным аралаш пыштыме але 73 процентым, силосым 125 тӱжем тонным- планын 75 процентшым. Тений 143 тӱжем гектар гыч шурным поген налман. Тушечын 123 тӱжем гектарже пырчан да пырчан-отызан культура, технический культурым 9 тӱжем утла гектареш вераҥдыме, кычкылык шудым- 10 тӱжем гектареш. Тыгак пареҥгым кок тӱжемат 300 гектарыште кӱнчыман, саскам тӱжемат 400 гектарыште погыман. Шудо кычкым планын 19 процентшым шийме. Республикыште пырчан культурымат шияш тӱналме. Тачысе кече марте куд тӱжем гектарыште тӱредме. Тидыже эше вич процент гына лиеш. 15 тӱжем тонн пырчым шийме. Кокла лектыш кызытеш ик гектарлан шотлымаште 25 центнерыш шуэш. Но йӱран игечылан кӧра пырче варарак шуэш. Тыгак эр шушо пареҥге ден саскам погаш тӱналме. Пареҥгым 40 гектарыште кӱнчымӧ, саскам 20 гектар гыч поген налме. Пареҥгын лектышыже 145 центнерыш погына, саскан- 150 центнерыш. У Торъял районысо «Первый май» озанлыкыште кокияш шЫпкыным (сурепицам) да уржам ӱдаш тӱналме. Нуным кызытеш 640 гектареш вераҥдыме, планын 30 процентше лиеш. Кокияшым чылаже тений 33 тӱжем гектареш вераҥдыман. Тидыже ӱмашсе нарак лиеш. Кокияшым ӱдаш 29 тӱжем гектар такыр пасум куралме. Ончылно эше кугу паша вуча.