Марий Элым вуйлатыше Российысе пӱртӱс поянлык да экологий министр Александр Козлов дене Изи Какшан эҥер серым пеҥгыдемдыме йодышым каҥашен.

             Марий Элым вуйлатыше Юрий Зайцев Российысе пӱртӱс поянлык да экологий министр Александр Козлов дене Изи Какшан эҥер серым пеҥгыдемдыме йодышым каҥашен. Республикым вуйлатыше палемден: олан ужашыже шошым Изи Какшан эҥерын шарлыме кумдыкышкыжо логалеш. Икмыняр ужашыштыже аралыме сооруженийлан кӧра толшо вӱдым шагалемден кертме. Вӱд налме ик кумдыклан Ширяйково микрорайон шотлалтеш. Кугу вӱд годым 40 илыме пӧрт, школ, йоча сад да моло социал объектым вӱд налеш. Серым пеҥгыдемдыме лӱмын ыштыме конструкций- влак кӱлыт,- ешарен Юрий Зайцев. Россий министр увертарен: ныл меҥге кужыт аралыме сооруженийым чоҥаш проект да смета документацийым ямдылыме. Федерал бюджет полшыжо манын эше икмыняр документым ямдылаш кӱлеш. Тунам вара ме министр- влак кабинет дене 2024-ше- 2026-шо ий- влаклан оксам ойырымо йодышым виктарен кертына.- каласен Александр Козлов.
            Тидымат ешарен: Росводресурс гидротехник сооружений- влакым капитально олмыкташ полышым пуэн шога. Тений Черный Ключ эҥерыште гидроузелым капитально олмыктен пытараш оксам ойыра. А 2025-ше ийыште Ургаш, Нуж, Туньинка эҥерлаште да Кугу Окаш ял воктене кукшо коремыште гидроузеллам капитально олмыкташ оксам ойыраш палемдыме. Вашлиймашыште тыгак чодырам тул деч араыме йодышымат тарватыме. 2023-шо 2025-ше ийлаште регионлан 80 миллион утла теҥгем технике ден оборудованийым налаш ойыралтеш.
             Фото: Марий Элым вуйлатышын  администрацийжын увер дене пашам ыштыше пӧлкаже.