Марий Элыште деловой да этнографий туризмым вияҥдаш тӱҥалыт

Марий Элыште деловой да этнографий туризмым вияҥдаш кӱлеш. Тыгай задачым шынден республикым вуйлатыше Александр Евстифеев. Марий Эл Российын рӱдыштыжӧ верланен, ойыртемалтше пӱртӱсшӧ, поян калык йӱлаже дене кугешнен кертеш. Чыла тидым туризмым вияҥдымаште кучылташ лиеш. Тидын нерген Правительстве пӧртыштӧ Республикым вуйлатышын эртарыме совещанийыште ойлымо. Туризмым вияҥдыме йодышлан пӧлеклалтше совещанийыште Евстифеев палемден: тенийсе идалык туризм пашалан сай лийын. Тидлан Россий кӱкшытан Спартакиадат йӧным ыштен. Но эркышнаш ок лий, - каласен тудо. Мемнан кундемыште игечылан кӧра туризм паша пӱртӱс жап дене кылдалтеш. Кызыт шыже. Сандене турист- влакым ешараш манын мом ышташ кӱлешым каҥашаш лач келшен толшо жап. Спорт-туризм министр Лидия Батюкован мутшо почеш, элыштына чыла унагудо- влак «шӱдыран» лийшаш улыт. Республикыштына 32 унагудо пашам ышта. тушечын 6-шо сертификацийым эртен да кум «шӱдырым» налын, иктыже- кок «шӱдыран». Тиде паша умбакыже шуйна. 2021-ше ийлан чыла унагудо «шӱдырым» налшаш улеш. Тыгак экскурсовод- влак аккредитацийым эртат. Кызытсе жаплан 74 экскусовод тудым эртен. Тушечын кандаш еҥже йот йылмым палыше улыт. Нуно экскурсийым англичан, финн да итальян йылме дене эртарен кертыт. Александр Евстифеев китай йылмым тунеммылан тӱткышым ойыраш темлен. Молан манаш гын, Юл кундем округышто Китай гыч ятыр группо путешествий дене коштеш. Мемнан декат пурен кертыт. Ямде лийман. Тыгак округысо регион- влак кокласе кыл нерген шоналташ кӱлеш. Тудо школ туризм дене кылдалтше проблемым, логистике, транспорт йодышым кораҥдаш полша ыле. Республикысе тоштер- влак Россий кӱкшытыштат сайын аклалтыт. Мутлан, Этнографий тоштер кеҥежым мийышаш Российысе 12 эн сай тоштер радамыш пурен. А моритлыме тумын частный тоштерже Российысе эн сай 15 частный тоштер коклаш пурен. Сувенир сатум лукшо отрасль тыгак вияҥын толеш. «Бендериаде» символикан сувенир- влак икымше Тӱнямбал конкурсын гран-прижым сеҥен налыныт. Эше ик у увер: «Пӱнчер» санаторий Российысе эн сай санаторий- влакын реестрышкышт пурен. Тидымат ешарыме: сувенир сатушто калыкле поянлыкым йоҥылыш ончыктымаш ынже лий. Тыгак промышленный туризмым вияҥдаш кӱлеш манын каласыме. Тудо шинчымашым пойдарыше да деловой лийын кертеш. Кокымшыжо ойпидышым, контарктым ыштыме дене мучашлалтеш. Тидыже республикылан пайдам конда.