Колонийыште портфельым ыштат
УФСИН-ын кумшо номеран колонийыштыже пластик портфель- влакым лукташ тӱналыныт. Ведомствын пресс-службыжын увертарымыж почеш, ныл еҥ ыштыман участкыште тылзеш тӱрлӧ тӱсан 30 тӱжем пластик кейсым лукташ палемдыме. Нуно кок форматан лийыт: А4 да А5 кагаз лаштык кугытан. Ончыкылык портфель режиман зоныш пӱчкедыме лаштык семын толеш. Вара тушко кылым да защёлкым пижыктат, ультразвукан сварке дене чыла ужашым пижыктен, иктыш чумырат, лейблым сӱретлат. Пашам тений шошым тӱҥалме. Тымарте заказчиклан 8 тӱжем портфельым колтымо. Тылзеш кумло тӱжемым лукташ палемдыме гын, вара тудо кок пачаш ешаралт кертеш. Молан манаш гын, пашам ышташ шонышо- влак ятырын улыт.