Йошкар-Олаште магистраль уремын кокымшо черетшым чоҥаш ямдылалтыт

                  Йошкар-Олаште магистраль уремын кокымшо черетшым чоҥаш ямдылалтыт. Киров ден Строитель уремлам ушен шогышо корнын Луначарский урем деч Карл Маркс уремысе оҥго дене ушнымаш марте ужашым чоҥаш проект да смете документаций ямдылалтеш. Проект почеш ныл полосан корнын кужытшо ныл меҥге наре шуйна, кок могырыштыжат тротуар, Изи Какшан гоч да кӱртньӧ корно гоч 200 метр кужытан кӱвар лийшаш,- умылтарат олан мэрийыштыже. Тиде корно илыме район да промышленный ужаш коклаште транспорт кылым саемдаш полшышаш. Тыгак Ленин проспект, Карл Маркс, Вознесенский да Водопроводный уремлаште транзит транспортым шагалемдышаш. Республикым вуйлатышын мутшо почеш, тиде проект Рӱдӧ кӱварым олмыкташ йӧным ышта. Магистральым чоҥымаш «Лӱдыкшыдымӧ качестван автомобиль корно- влак» калыкле проект почеш шукталтеш.