Йошкар-Олаште икымше тӱнямбал сарын салтакше- влаклан чапкӱ- мемориалым ышташ оксам погат

             Йошкар-Олаште икымше тӱнямбал сарын салтакше- влаклан чапкӱ- мемориалым ышташ 8 миллион наре теҥге оксам погымо. Марий кундем гыч икымше тӱнямбал сарыш кайыше воин- влакым шарныктыше скульптурный мемориалым ышташ 9 миллионат 78 тӱжем теҥге кӱлеш. Тыгеже эше ик миллионат 178 тӱжем тенгем погаш кодын. «Кок вуян пӱркыт/ Марий Эл» сообществын увертарымыже почеш 1914-ше 1918-ше ийласе кугу сарыш мемнан кундем гыч 50 тӱжем наре еҥ каен. Руш император армийын салтак ден офицерже- влак шке илышыштым чаманыде шочмо элын интересшым араленыт. Нунын кокла гыч шукыжо боевой награде дене палемдалтын, Георгиевский кавалер лийыныт.
             Ушештарена: мемориалым Йошкар-Оласе рӱдӧ каныме да тӱвыра паркын тӱҥ аллейыштыже вераҥдаш палемдыме. Тистым да винтовкым кучышо салтакын борнзо гыч ыштыме скульптурыжо гранит негызеш шындалтеш да курымашлык тул могырыш онча. Тудо Российлан служитлыше тӱрлӧ жапысе герой- влакым ушен, архитектурно-скульптурный композицийым пойдара. Чапкӱм ыштымашке кажне еҥ шке надыржым пыштен кертеш. Тидым ышташ «Царёв город» поро кумыл фондын сайтше полшымо дене ышташ йӧнанрак лиеш.
          Фото: tsarevgorod.org. сайт гыч сӱрет. «Йошкар-Ола» газет.