«Йошкар-Ола театральный» фестиваль лишемеш
«Йошкар-Ола театральный» фестиваль лишемеш. Тудо Театр пашаеҥ- влак ушемын Марий пӧлкажлан 80 ий теммылан пӧлеклалтеш да 22-шо гыч 27-ше март марте эртаралтеш. Репертуарышке тургымысо 11 спектакльым пуртымо. Форумым Марий самырык театрын «Йӱд орол» спектакльже дене почыт. Тиде кечынак Эрик Сапаев лӱмеш опера да балет академический театрыште «Ош йӱксӧ» балетым ончыктат. 23-шо мартыште Шкетан лӱмеш марий драма театрыште шым йылме дене «Фолкс» спектакльым ончаш лиеш. А Константинов лӱмеш Руш академический театрыште кастене «Леди Макбет Мценского уезда» драмым шындат. Вес кечынже Курык марий драма театр, 25-ше мартыште Курчак театр ден опера да балет театр, 26-шо числаште курчак театр, Шкетан театр да руш театр пашаштым ончыктат. Фестиваль 27-ше мартыште Курчак театрыште Йыван Кырла лӱмеш калыкле театр премийым кучыктымаш дене мучашлалтеш.
