Ветеринар лабораторийын у корпусшым чоҥат
Тений республикыштына ветеринар лабораторийын у корпусшым почыт. Тудым чоҥымо йодышым Правительстве пӧртыштӧ Марий Элым вуйлатыше Александр Евстифеевын эртарыме совещанийыште ончымо. Кызыт республикысе ветеринар лабораторийын лабораторий корпусшым чоҥымаш тӱҥалын. Тудо вольык продукцийын качество да лӱдыкшыдымылыкшӧ шотышто шымлымашым ятырлан шукемдаш полша. А тидыже йотэл рынкыш утларак сатум колташ да республикын экспорт куатшым кугемдаш йӧным ышта. Кызыт проект да смете документаций почеш объект кундемыште ямдылалтмаш паша кая, жаплан ыштыме да кӱлдымӧ сооружений- влак кораҥдалтыт. Свайым кырат, бетон пашалан опалубкым, каркасым ямдылат. Паша график почеш кая. Тений ыштен шуктышаш улыт. Тиддеч вара ветеринар лабораторийын штатше 10 еҥлан ешаралтеш.