Йошкар-Ола станцийышке корным вӱд мушмо деч аралыше поездым кондымо
Йошкар-Ола кӱртньӧ корно станцийышке корным вӱд мушмо деч аралыше поездым кондымо. Горький кӱртньӧ корнын Озаҥысе пашазыже –влак инфраструктурым шошо вӱдшорым эртарен колташ ямдылалтмашым мучашленыт. Регион кумдыкышто 846 искусственный сооружений, кӱвар, вӱдым колтымо пуч, вӱдым йоктарыме корем да молат улыт. Вӱд сооруженийлаште лум да ийын шулымыштым арня еда терген шогат, кугу кӱвар меҥге воктене ийым каткалат. Кӱртньӧ корным да мланде валым вӱд мушкын колтымо деч аралаш кӱртньӧ корнын Озаҥ кундемыштыже 9 поездым чумырымо. Тыгай поездын составыштыже пырня, пиломатериал, тыгыде кӱ, шпал, рельс- влакым чумырымо. Тыгай поезд- влак Алатырь, Канаш, Нуя, Буа, Йошкар-Ола, Зелёный Дол, Озаҥ, Арск да Вятские Поляны станцийлаште вераҥдалтыныт.