Урем гоч йолын вончымо вер- влакым уэмдаш 11 миллион теҥге оксам кучылташ палемдыме

                      Йошкар-Оласе кучем урем гоч йолын вончымо вер- влакым уэмдаш 11 миллион теҥге оксам кучылташ палемден. Тиде сомылын заказчикшылан ола озанлык виктем шотлалтеш. Кок электрон аукционым увертарыме. Тӱшка акше 11 миллионыш шуэш. Тиде шийвундо дене олан тӱрлӧ ужашыштыже 32 вончемым уэмдаш лийме. Контрактым ыштымеке паша вигак тӱҥалшаш да 31-ше дкабрьыште мучашлалтшаш. Паша тӱрлӧ шотан лиеш. Мутлан, Карл Либкнехт уремысе 64-ше пӧрт тураште корнышто тӧрсырым ышташ, кок корно палым да разметкым ыштыман, Чавайн бульварысе 20-шо пӧрт тураште кок светильникым ешарен шындат, Карл Маркс урем дене Хасанов урем корнывожышто светофорым, келшыше палым, изи саварым, вончем деке корным ыштышаш улыт. Яков Эшпай ден Чехов урем ушнымаштат тыгаяк паша вуча. Тыгак «Лӱдыкшыдымылык отро» манме келыштарымашым умбакыже чоҥаш тӱҥалыт. Тудо Йошкар Армий уремыште, Первомай ден Кремль урем, Вашский ден Советский урем корнывожышто лийшаш улыт. Тиддеч посна лӱдыкшыдымылык дене кылдалтше мола пашат шукталтеш.