Тора яллан врач

                 Тений республикыште «Земский доктор» да «Земский фельдшер» программе почеш 35 миллион утла теҥгелан 29 медицина пашаеҥ дене ойпидышым кылдаш лийме. Тыге тора яллаш 21 врач да кыдалаш звенон 8 специалистше кайышаш. Тушечын 25-ше корно укеан, транспорт коштдымо утларак тора да миен шуаш неле верлашке кайышаш. Кодшо ийын нине программе почеш 42 ойпидышым ыштыме ыле. Нунылан 41 миллионат 750 тӱжем теҥге оксам тӱлымӧ. Яллашке 9 врач ден 11 фельдшер, посёлкылаш 21 врач, изи олаш ик врач каеныт. Тора ялыш каяш 7 врач ден 8 фельдшер келшеныт.