Кодшо ийын чодырам шындыме пашалан 124 миллион теҥгем кучылтмо

                 Республикыштына кодшо ийын чодырам шындыме пашалан 124 миллион теҥгем кучылтмо. Республикын кумдыкшо 23 тӱжем утла квадрат километрыш погына. Тушечын 60 процентшым чодыра айла. Пӱтынь чодыра фондын кумдыкшо гыч вӱдым аралыше, санитар-гигиена функцийым шуктышо чодыра 45 процент, пайдаланыме чодыра 55 процент улеш. Чодыра озанлыкыште ик эн кӱлешан пашалан чодырам аралымаш да тудым уэш шынден пӧртылтымаш шотлалтеш. 2010-шо -2020-шо ийлаште тӱрлӧ амаллан кӧра 39 тӱжем гектар чодыра пытен. Тушечын тул пижмылан кӧра- 31 тӱжем гектарже. Тиде жапыштак 33 тӱжем утла гектареш самырык пушеҥгым шындыме. Кодшо ийын кум тӱжем утла гектареш вераҥдыме. Тидыже 19-ше ий деч 14 процентлан шукырак. Тыгак чодыра культурым тӱжемат пеле гектареш вераҥдыме, вич тӱжем утла гектарыште эрыкташ руымо, тӱжем утла гектарыште  эҥгекым кондышо организам ваштареш кучедалме, тидын годым химий кучылталтын огыл. Тыге чодырам пӧртылтымӧ пашалан 124 миллион теҥге каен. Ушештарена: теҥгече Чодыран тӱҥямбал кечыже палемдалтын.