Тений республикыштына 30 меҥге кужыт посёлкыла кокласе да илем кӧргысӧ газ пучым чоҥымо лиеш

                       Таче Марий Элым вуйлатыше Александр Евстифеев Российыште кундемлам вияҥдыме шотышто Правительстве комиссийын заседанийыштыже участвоватлен. Тудым элысе Правительство председательын алмаштышыже Марат Хуснуллин эртарен. Каҥашыме ик йодышыжо- яллашке газым пуртен пытарыме да Россий президентын кӱштымыж почеш газ пуч деке пайдаланыше- влакым ушымо нерген лийын. Икымше июньлан шотлымаште республикыштына газификаций 89 процентым эртен, а ял кундемлаште- 78 процентым. Газым пуртымо программе почеш тений 30 меҥге кужыт пучым шупшман. Акше ик миллиардат 360 миллион теҥгеш шуэш. Кызыт газым пуртыдымо пӧрт ден ялла, сад-пакча товариществе- влак нерген уверым ямдылыме. Тидыже газым пурташ мыняр окса кӱлешым рашемдаш полша. Тиде увер почеш газым пуртымо 441 ялыште куд тӱжемат 900 утла пӧртыш газым пуртымо огыл. Тиде пашалан 867 миллион теҥге кӱлеш. Каҥашыме эше ик йодыш «Илыме вер да оласе кумдык» проектым шыҥдарыме дене кылдалтын. Вице-премьер палемден: эртыше арня чоҥымо отрасльлан сай лийын. Молан манаш гын, Президентын шындыме задачым шыҥдарымашым куштылемдаш полшышо икмыняр кӱлешан решенийым пеҥгыдемдыме. Тӱнямбал экономик форумышто льготан ипотеке программым шушаш ийын икымше июль марте шуйымо. Тиде кугу полыш.