Магистральым чоҥымаште- чарак
Йошкар-Оласе Киров ден Строитель уремлам ушен шогышо магистральым чоҥымаште поставщик- влак чаракым ыштат. Олан прокуратурыжо подряд организацийым вуйлатышылан пашам жапыштыже шуктымо шотышто шижтарымашым увертарен. Пале: муниципал заказын дирекцийже 19-ше ий мучашыште «Марийскавтодор» предприятий дене магистральым чоҥаш контарктым пеҥгыдемден. Тудын дене келшышын графикым ыштыме. Документ почеш автомобиль кӱварын пролётшо- влакым тений декабрь марте вераҥден шуктышаш улыт, а кӱварын меҥгыже да йолын коштмо ужашыже октябрь марте ямде лийшаш. Пашам шукташлан Зеленодольскысо завод дене кӱртньӧ пролётым май мучаш марте кондаш контарктым ыштыме. Но завод жапыштыже тичмаш йодмашым конден шуктен огыл. Тидыже муниципал контарктым кӱрлмашке конден кертеш. Сандене прокуратура тиде пашам тергымаште куча.