Коронавирус дене черланыше- влакым рашемдыме предприятийлаште чарыме мероприятийым пурташ темлыме

                     Республикым вуйлатыше Александр Евстифеев коронавирус дене черланыше- влакым рашемдыме предприятийлаште чарыме мероприятийым пурташ лийме йодышым ончен лекташ кӱштен. Правительствын заседанийыштыже тазалыкаралтыш министр Марина Панькова эпидемиологий ситуацийын писын начареммыже деке тӱткышым виктарен. Тидыже вакцинацийын начарын кайымыж дене кылдалтын, каласен тудо. Тидыже предприятийлаште тӱшкан черланымашке да черле- влакын чотышт писын ешаралтмашке шуктен кертеш. Амалжылан организацийлам вуйлатыше- влакын пашаеҥыштын тазалыкышт верч начар тургыжланымышт нерген ойла. Сандене черле- влакым рашемдыме годым предприятийлаште чарыме мероприятийым пурташ темлен. Пытартыш кум кечыште нелын чераныше- влакын чотышт ныл процентлан ешаралтын, уло пациент кокла гыч 61 процентше кислород полышым вуча, ИВЛ дене 17-18 еҥ пайдалана. Эмлыме верыште улшо 99 процент черлылан пневмоний диагнозым шындыме. Пневмоний утларак неле лийын. Молан манаш гын, стационарыш варашрак толыт, калык лушкен. Черым чарыме ик йӧн гына- вакцинаций. Россий мучко вакцинаций туҥалмым шотыш налын, тӱшка иммунитетым шушаш ийын августлан  вучат гын, республикыште 2023-шо ийын февральлан гына. Вакцинацийын начар кайыме ик амалжылан прививке деч вара осложнений лиеш манын лӱдмашым шотлат. Но республикыште тыгай неле осложненийым регистрироватлыме огыл. Кызыт йоча- влакат черланат. Марий Элым вуйлатыше палемден: вакцинаций деч посна у тунемме ий тӱҥалмылан коронавирусын у толкынжо тӱҥал кертеш. Сандене шке да йоча- влакын тазалыкышт верч кӱлынак шоналтыман.

Прошлые выпуски