Калыкле проект- влак пашаверым ышташ полшат

                 Калыкле проект- влак республикысе кучемлан 18 тӱжем утла пашаверым ышташ полшат. Пашам ыштыше калык чотым арален кодымо да проект- влакым шыҥдарыме годым пашаверым ешарыме, пӱтынь паша рынкыште ситуаций нерген йодышым Марий Элым вуйлатышын эртарыме Правительствын заседанийыштыже ойлымо. Палемдыме: регионышто вияҥме 11 корно дене 46 проект шыҥдаралтеш. Нуно чыланат паша рынкыште ситуацийым саемдымашке виктаралтыныт. Мутлан, «Демографий» проектыште шуко мероприятийже пашам ыштен кертше калыкым шукемдымашке виктаралтын. Йоча тӧнеж- влакым чоҥымаш ӱдырамаш- влаклан пашаш лекташ йӧным ышта. Изи да кыдылаш предпринимательстве шукырак еҥым пашаш налаш полша. Корно, илыме вер да оласе кумдык шотышто проект-влак чоҥымо отрасльыште пашазе- влакым арален кодаш, у верым ышташ йӧным пуа. Республикым вияҥдыме индивидуал программе 24-ше ий марте 630 пашаверым  почаш йӧным пуа. Тыгак моло проект шотыштат. Йодышым ончымо деч вара Республикым вуйлатыше Александр Евстифеев палемден: пытартыш жапыште паша рынкым пеҥгыдемдаш да у пашаверым ышташ Правительстве велым ятыр пашам шуктымо. Туге гынат, пашадымылык кушмаш уло. Сандене пашам луштарыман огыл.