Тӱҥ книгагудышто Книгагудо кечым палемденыт

          Тӱҥ книгагудышто Пӱтынь Российысе книгагудо кечым палемденыт. Тудыжо 27-ше майыште лийшаш.  Сергей Чавайн лӱмеш книгагудышто таче книгагудын кечыжлан пӧлеклалтше торжественный мероприятий эртен. Тушто тӱҥ событий семын «Марий Элысе эн сай муниципал книгагудо тӧнеж- влак да нунын пашаеҥышт» Республике кӱкшытан конкурсым иктешлыме да сеҥыше- влакым саламлыме. Конкурс тыгай номинацийла дене эртен: «Эн сай рӱдӧ книгагудо», «Эн сай изи книгагудо» да нунын эн сай пашаеҥышт. Мероприятийыште тыгак ойыртемалтше пашаеҥ- влаклан правительствын да ведомствын наградыштым кучыктымо.
         А шушаш шуматкечын Чавайн лӱмеш книгагудышто лудшын билетшым да книгам пӧлеклаш тӱналыт. Тиде кечын тушто «Библиойӱд» Россий кӱкшытан акций эрта. Тений тудым икымше гана кусарыме да книгагудын кечыж деке лишемдыме. Тӱвыра событийын темыже «Йӱла- влак нерген» лиеш. Тиде йӱдым тушко мийыше- влак калык сымыктыш, промысел, йӱла, тӱвыра памятник да фольклор дене палыме лийыт. Усталык мастер-класс, калык вургемым ончыктымаш, мурымаш да куштымаш номер- влак, ончер- влак вучат. Книгагудо 22 шагат марте пашам ышта. Оксам тӱлыде пураш лиеш.
       Тӱвыра министерствын фотожо.