Спорт - тазалык

Йоча-влакым аралыме кечын Куженер посёлкысо школышто у ГТО спортплощадкым почыныт. Пайремыш погынышо-влакым Республикысе самырык политика, спорт да туризм министрын алмаштышыже Михаил Камаев, Куженер район администраций вуйлатыше Сергей Михеев саламленыт. Площадкылан оборудованийым «Спорт - норма жизни» федерал проект почеш налме. Тушко ГТО нормым шукташ кӱлшӧ тӱрлӧ тренажер ден снаряд-влак пурат. Эше ик ГТО площадка тений Оршанка районышто почылтшаш.