Марий Элыште утларак ямде улмо режимым 5-ше июль марте шуйымо
Марий Элыште утларак ямде улмо режимым 5-ше июль марте шуйымо. Тидын нерген Марий Элыш у коронавирус инфекцийым кондымым да шаркалымым шижтарыме шотышто оперативный штабын эртыше заседанийыштыже регионым вуйлатыше Александр Евстифеев увертарен. Республикысе тӱҥ санитар врач Светлана Булатован палемдымыже почеш, кундемыштына коронавирус дене черланымаш кушкаш тӱҥалын. Эртыше кок арня жапыште пневмоний дене черланыше-влакын чотыштат кугемын. «Ковид-19» диагноз дене станционарлашке 2 пачаш шукырак черле пурен. Эмлымверлаште коронавирус деч эмлалтше-влаклан 45 койковерым ешарен ыштеныт. 31-ше май эрденылан республикысе инфекций станционарлаште 327 еҥ эмлалтын. 160 черле – коронавирус инфекциян. СтопкоронавирусРФ сайтын увертарымыже почеш, 5 кече жапыште Марий Элыште ты инфекций деч 10 еҥ колен.