Школым чоҥымо пашам контрольышко налме

           Марий Элым вуйлатышын пашажым шуктышо школым чоҥымо пашам шке контрольышкыжо налын. Правительствыште эртыше оперативный совещанийыште Юрий Зайцев республикысе школлаште олмыктымо пашан кузе кайымыже нерген йодышыш тӱткышым виктарен. Туныктыш министр Лариса Ревуцкаян увертарымыже почеш кызыт куд школым олмыктат. Министерствын пашаеҥже- влак объектлашке чӱчкыдын лектын коштыт. Подрядчик- влак чоҥымо пашан шергештмыже нерген ойлат, кызыт сметым таҥастарымаш кая. Чоҥымаш министр Михаил Степанов школым чоҥымаште концессий ойпидышым шыҥдарыме нерген ойлен. Тыгай йӧн дене Килемар районысо Кугу Памъялыште 80 верлан да Йошкар-Оласе «Юбилейный» микрорайонышто «Канде кайык» гимназий чоҥалтыт. Кугу Памъялыште тений ноябрьлан пашам мучашлаш палемдыме. «Канде кайык» шотышто заключенийым июль мучашыште налшаш улыт. Кок объектыштыжат концессионер- влак чоҥымо жапым пудыртеныт. Марий Элым вуйлатышын пашажым шуктышо тидлан пеҥгыдын вашештен: тыге ок лий, тиде ситуацийлан правовой акым пуыман манын. Концессий соглашенийым шыҥдарыме йодышым тудо шке контрольышкыжо налын.
             Фото: Марий Элым вуйлатышын организаций да аналитик виктемже.