Республикым вуйлатышын сомылжым шуктышо ден Угарман областьын губернаторжо пырля шуктышаш проект- влак шотышто ойпидышым кылденыт

            Республикым вуйлатышын сомылжым шуктышо ден Угарман областьын губернаторжо Глеб Никитин кок правительстве коклаште туризм аланыште пырля шуктышаш проект- влак шотышто ойпидышым кылденыт. Губернатор лӱмын Юриныш толын да Шереметевмыт илемым пырля вияҥдыме планым раш каҥашыме. Угарман уна- влаклан замок мучко экскурсийым эртарыме. Вара документеш кидпалым пыштеныт. Пытартыш жапыште замок деке интерес кушкын. Тидлан Угарман гыч Юриныш «Валдай» эҥер вӱд маршрутым колтымат йӧным ыштен. Глеб Никитин «Валдайыш» билетым ончылгоч налын пытарат манын каласен. Пеҥгыдемдыме ойпидыш Шереметевмыт ешын коллекцийжым ончыктышо тоштер ден выставкым ышташ йӧным пуа. Угарманыште тиде ешын 300 ий наре погымо тӱжемат 200 наре предметше аралалтеш. Тиде- атышӧр, мебель, сар-курал, куэм, лу гыч ыштыме ӱзгар да молат. Эше 350 предмет Марий Элысе тоштерыште вераҥдалтын. Юрий Зайцев палемден: Юрино посёлкын турист куатше пеш кугу. А рӱдыжӧ Шереметев замок лиеш.
             Фото: Марий Элым вуйлатышын организаций да аналитик виктемже.