Сар жапысе архив документ- влакын выставкыже пашам ышта

             Йошкар-Олаште сар жапысе архив документ- влакын выставкыже пашам ышта. Республикын кугыжаныш архивыштыже «Фронт тыл гоч эртен» ончер почылтын. Тушто 1941-ше ийын шыжым да телым Марий АССР кундемыште аралалтме рубеж- влакым чоҥымо нерген каласкалалтеш. Ноябрь-декабрьыште Юл эҥерын шола серыштыже Курык марий да Звенигово районлаште шӱдӧ меҥге наре кужыт окопым кӱнчымӧ. Чатлама йӱштӧ годым, шокшо вургем да кочкыш ситыдымым ончыде республике гыч 40 тӱжем наре еҥ шӱдӧ дене блиндаж ден землянкым, траншей ден окопым, танкым чарыше коремым кӱнченыт. Экспонат радамыш чоҥымаш нерген отчёт, аралыме рубежын схемыже, пашазе- влакын паша кече радамышт, фотосӱрет ден плакат- влак пуреныт. Выставкым 11-ше май марте ончаш лиеш.
           Тӱвыра министерствын фотожо. «МариМедиа».