Росздравнадзорым вуйлатыше Алла Самойлова республикыш толын каен

                   Росздравнадзорым вуйлатыше Алла Самойлова республикысе калыкым вакцинироватлалташ ӱжын. Тудлан республикыш толаш амалым элысе 13 регионышто да Марий Элыштат эпидемиологий обстановкын начареммыже пуэн. Российын Президентше Владимир Путин ведомствылам вуйлатыше- влаклан регионлашке мияш да медицина пашаеҥ- влалкан полышым пуаш кӱштен. Росздравнадзорым вуйлатыше Алла Самойлова сарын ветеранже- влаклан республикысе клинический госпитальыш миен да тазалыкаралтыш министр Марина Панькова дене черле- влакым ончен лектын. Тудо палемден: «йошкар зоныш» мийымаш эше ик гана моло кундемлаште ужмым пеҥгыдемден ончыктыш. Ятыр пациентше прививкым ыштыктен огыл. Реанимацийыште кислород дене кийыше, сакыр диабетан, кугу давлениян да молат вакцинацийым эртыдыме улыт. Тидымат ешарен: калыклан жапым шуйкалыде прививкым ыштыктыман, а хронический черан- влаклан шкем шке эмлымым чарнен вигак врач деке кайыман. Тиддеч посна тудо Республикысе онкологий диспансерыште, икымше номеран медсанчастьын поликлиникыштыже, Перинатал рӱдерыште, кумшо номеран йоча поликлиникыште лийын.
                 Фото: МедиаПоток