Оршанка районышто гидротехник узелым тӧрлымӧ паша умбакыже шуйна

               Оршанка районышто гидротехник узелым тӧрлымӧ паша умбакыже шуйна. Марий Элым вуйлатыше Оршанке районыш паша дене мийымыже годым Ӧрша эҥерыште гидротехник сооруженийым капитально олмыктымо пашам ончен. 2022-шо ийын кеҥежым тушто плотинам вӱд мушкын ыле. Республикым вуйлатыше Юрий Зайцевын кӱштымыжӧ почеш кодшо ийын ноябрьыште объектым пужен ышташ тӱҥалме. Кызыт мо кӱлешым рончымо, йымачын вӱдым колтымо йӧнештарымашым ыштыме, вӱдым колтымо сооруженийын фундаментшылан негызым келыштарыме. Тыгак топливно –шахтный сбросым пужен ышташ, пӱя серым пеҥгыдемдаш да тӱзландараш палемдыме. Пӱя пундашыш йошкын шуко погынымылан кӧра, тудым эрыкташ кӱлешлык лектын. А тидлан район бюджетлан ешартыш окса полышым ойыраш кӱлеш. Республикым вуйлатыше ончен лекмеке палемден: шошо вӱшор годым кундемлаш вӱдлан шарлаш пуыман огыл. Сандене кызыт вӱдшор эҥгекым ынже кондо манын ончылгоч ыштыме паша пеш кӱлешан.
             Фото: Марий Элым вуйлатышын  администрацийжын увер дене пашам ыштыше пӧлкаже.