Марий Элыште лу ий жапыште тӱжем утла шуко пачеран пӧртым капитально олмыктымо

            Марий Элыште лу ий жапыште тӱжем утла шуко пачеран пӧртым капитально олмыктымо. Республикым вуйлатыше Юрий Зайцев видеоконференций йон дене Россий Правительстве председательын алмаштышыже Марат Хуснуллинын эртарыме совещанийыште участвоватлен. Тушто калыкле проектлам, специальный инфраструктуро проектлам шыҥдарыме, шуко пачеран пӧртлам капитально олмыктымо йодышлам каҥашыме. 2014-ше ий гыч Марий Элыште ик тӱжем утла шуко пачеран пӧртым  олмыктымо. 2023-шо ийыште 71 тыгай пӧртым ачалыме. Тенийлан 92 пӧртым олмыкташ палемдыме. Тушто 64 леведышым, 25 фасадым ачалат, пӧрт кӧргысо 120 инженер системым да 54 лифтым вашталтыме лиеш. Республикым вуйлатыше палемден: паша качествым терген шогыман, илыше- влаклан йӧндымӧ ынже лий манын тудым график почеш шуктыман.
             Фото: Марий Элым вуйлатышын  администрацийжын увер дене пашам ыштыше пӧлкаже.