Мемнан-влак медальым конденыт
Татарстан республикысе Болгар олаште корэш кучедалмаш дене Россий кӱкшытан таҥасымаш эртен. Каласыман: ты вер-шӧр «корэшын» шочмо кундемжылан шотлалтеш. Таҥасымашке спортсмен-влак Российын 20 утла регионжо гыч чумыргеныт. Нелыт шот дене нуно 5 тӱшкалан шелалтыныт. Марий Эл гыч тушко «Корэш» олимпийский резерв комплексный спортшколын воспитанникше-влак миеныт. Нуно ик шӧртно, кок ший да ик той медаль дене пӧртылыныт.