Мобильный бригада садышкат мия

Республикысе тазалыкаралтыш министерствын увертарымыже почеш, 7-ше июнь эрлан Марий Элысе инфекций стационарлаште 367 еҥ эмлалтеш. Эртыше суткаште 23 еҥ эмлымверышке логалын. Чылаже инфекций отдленийлаште 183 айдеме коронавирус деч эмлалтеш. ИВЛ аппарат полшымо дене 18 еҥ шӱла. Эше ик еҥ колен. Тидын годым Марий Элыште Ковид деч прививка кампаний умбакыже шуйна. Медик-влакын ойлымышт почеш, вакцинаций деч вара айдеме черлана гынат, чер куштылгын эртышаш. Йошкар-Олаште коронавирус деч прививкым мобильный пунктлаштат ыштыкташ лиеш. 11-ше июнь марте тудо 10 гыч 17 шагат марте Ленин лӱмеш тӱвыра полатыште да 9 гыч 15 шагат марте Эшкинин уремысе Шуко функциян рӱдерыште пашам ышта. Тылеч посна вакцинацийым сад ушемлаштат эрташ лиеш. Мобильный бригада-влак 12-шо июньышто «Гигантыште», 19-ше июньышто «Агрохимикыште» да 26-шо июньышто «Дружба» сад ушемыште пашам ыштат.