Уто кагазым ит чамане
10 ий утла Йошкар-Олаште «Плюшкинын кечыже» акций эрта. Тиде экологий акцийым Йошкар-Оласе администраций эртара. Тудын жапыште рӱдоласе школла ден йоча садлашке коштшо икшыве-влак макулатурым погат. Тений 11 школ ден 39 йоча сад ушнен. Тыге 33 тонн утла кагаз погынен. Школ-влак кокла гыч эн шуко макулатурым 12-шо номеран школ, йоча сад-влак коклаште 34-ше номеран йоча сад эн шуко чумыреныт. Нунылан диплом ден кумылаҥдыше призым кучыктышаш улыт.