Марий Элым вуйлатыше республикым вияҥдыме йодыш дене совещанийым эртарен
Марий Элым вуйлатыше республикым социал-экономик велым вияҥдыме йодыш дене совещанийым эртарен. Тушто кодшо ийым иктешлыме да тенийлан план нерген мутланыме. Кодшо ийын калык озанлыкым вияҥдымаште сай вашталтыш- влак палдырненыт. Ял озанлык продукцийым лукмаш 50 миллиард теҥгем эртен да 19-ше ий деч ныл процентлан ешаралтын. Чоҥымо пашаште кодшо ийын 22 миллиард утла теҥгеаш пашам шуктымо, тидыже ончылийсе деч 19 процентлан шукырак. Тиде сомыл дене республике Юл кундем округышто икымше верыш лектын. Экономикым да социал сферым вияҥдаш кодшо ийын тӱҥ капиталыш инвестицийым 36 миллиард утла теҥгем пыштыме. Тидыже 19-ше ийысе деч 23 процентлан шукырак. Регионысо предприятий- влак кодшо ийын 24 миллиард теҥгелан 176 инвестиций проектым шыҥдареныт. Эн кугуракше- влак коклаште- Марий целлюлоз кагаз комбинатым уэмдымаш да очистной сооруженийым чоҥымаш, «Шойбулак» племзаводын элеваторжо ден комбикорма заводшым, сосна комплексшым чоҥымаш, «Марбиофарм» производствыжым модернизироватлен, «Семёновский» племзавод роботизироватлыме фермым чоҥен. Тыгак кодшо ийын 170 меҥге утла кужыт автомобиль корным олмыктымо. Моло шӧрыныштат сай вашталтыш- влак улыт.