«Илыме вер да оласе кумдык» калыкле проект почеш тений тошто пӧртла гыч уже 195 еҥым кусарыме
«Илыме вер да оласе кумдык» калыкле проект почеш тений тошто пӧртла гыч уже 195 еҥым кусарыме. 2019-ше- 2023-шо ий- влаклан палемдыме «Аварийный илыме верла гыч калыкым кусарымаш» республикысе адресан программын кокымшо йыжыҥжым шыҥдарыме кышкарыште 8 тӱжемат 801 квадрат метр аварийный илыме верым кораҥдаш да 643 еҥым кусараш кӱлеш. 28-ше апрель марте кок тӱжемат 893 квадрат метр тошто пӧртым пытарыме да 195 еҥым кусарен шуктымо. 179 пачерым налаш контарктым ыштыме, илыме верын 72 озажлан оксам тӱлымӧ нерген соглашенийым ыштыме. Российысе кундемлаште «Илыме вер да оласе кумдык» проектым шыҥдарымаш кузе кайыме нерген Россий правительстве председательын алмаштышыже Марат Хуснуллинын эртарыме кундемлам вияҥдыме шотышто Правительство комиссийын заседанийыштыже ойлымо. Видеоконференцкыл йӧн дене эртарыме заседанийыште Марий Элым вуйлатыше Александр Евстифеев участвоватлен. Калыкле проект шотышто проект комитетын кодшо ий октябрьысе заседанийжын протоколжо почеш Марий Эллан илыме верым чоҥымо шотышто тыгай задаче- влакым шындыме: тений 363 тӱжем квадрат метр илыме верым чоҥыман, вес ийын 386, умбакыжат ешаралт толеш, 2027-ше ийлан 547, 2028-ше- 2030-шо ийлаште 566 тӱжем квадрат метрым. Тений январь- апрельыште 97 тӱжем квадрат метр илыме верым пашаш налме.