Йошкар-Ола гыч тунемше Россий кӱкшытан олимпиадыште сеҥышыш лектын

                  Йошкар-Оласе 28-ше лицейын тунемшыже школьник- влакын Россий кӱкшытан олимпиадыштын иктешлыше йыжыҥыштыже сеҥышыш лектын. Санкт-Петербургышто технологий дене олимпиадын иктешлыше йыжыҥже мучашлалтын. Тушто 65 регион гыч 241 тунемше уш-акылжым ончыктен. Саламлымаш онлайн-формат дене эртен. Тушто 19 сеҥышым да 89 призёрым палемдыме. Сеҥыше- влак радамыш Йошкар-Оласе 28-ше лицейын 11-ше классыштыже тунемше Михаил Бакулевский пурен. Тудо технологий дене олимпиадышке 7-ше класс гычак ушна. Индешымше классыште иктешлыше йыжыҥыште призёр лийын. Республике гыч эше кок тунемше олимпиадын иктешлыше йыжыҥыштыже участвоватла: Политехнический лицей- интернат гыч биологий дене Артём Золотцев да Курык марий районысо Кузнецово школ гыч физкультура дене Константин Рожков.