Ынде Йошкар-Олаш Угарман гыч турист поездым вучена

              Угарман гыч Йошкар-Олаш да мӧҥгешла турист поездым колтымо йодыш кызыт каҥашалтеш. Спорт- туризм ден транспорт министерстве- влаклан туроператор организаций- влак дене пырля Угарман область дене регион- влак кокласе туризм кылым вияҥдыме пашам виктараш задачым шындыме. Тыгай кӱртньӧ корно турист маршрут Самара ден Йошкар-Ола коклаште ышталтын да сай шонымашым луктын. Россий мучко коштмылан кугыжаныш субсидийым пуымо «Турист кешбек» программе дене утларак кумдан палдарыман. Тыште кӱртньӧ корно да вӱд туризмат шотлалтеш. Кокымшыжо Козьмодемьянск ден Юриным вияҥдыме дене кылдалтын. Унагудо- влакым уэмдыме да чоҥымо шотышто федерал проектлаш ушнаш кӱлешан инвестиций проект- влакын перечньышт ышталтеш. Нине йодышым Президентын посланийжым илышыш шыҥдарыме шотышто задаче- влакым рашемдыме шотышто правительствын заседанийыштыже нӧлталме.