Илаш йӧрыдымӧ пӧртла гыч кусарыме у программе республикысе калыклан полышым пуа

               Илаш йӧрыдымӧ пӧртла гыч кусарыме у программе республикысе калыклан полышым пуа. Владимир Путин партийын погыныштыжо ойлышыла, тений икымше январь марте аварийныйлан шотлымо тошто пӧртла гыч калыкым кусарыме у программылан 45 миллиард теҥгем ойыраш темлымашым сайлан шотлен. У кварталым чоҥымо годым чыла социал инфраструктурым, тӱзландарыме, тӱшка транспортым вияҥдыме йодыш- влакым шотыш налман. Чыла тидым калык дене пырля ыштыман. «Калык бюджет» механизмым кучылтман. Тидын годым калык мо кӱлешым шке рашемда- олмыкташ але чоҥаш.- каласен элым вуйлатыше. Ончыкылык 6 ийыште 10 миллион наре квадрат метр тошто пӧртла гыч 530 тӱжем наре еҥым кусарыман. Марий Элыште 70 тӱжем квадрат метран 328 шуко пачеран пӧрт гыч вич тӱжем енлан сай илыме верым пуыман. Чоҥымаш министерствын увертарымыж почеш, 2019-ше- 2023-шо ийлан «Аварийный илыме верла гыч калыкым кусарымаш» республикысе адресан программе кышкарыште 17 тӱжем утла квадрат метр тошто илемым пытарыме да тӱжемат 200 еҥым кусарыме.