Филармоний 13-шо августышто почылтеш
Яков Эшпай лӱмеш марий кугыжаныш филармонийым 13-шо августышто официально почшаш улыт. Тушто чыла чоҥымо да монтаж паша мучашлалтын. У тӱвыра тӧнежым национальный элемент-влак дене сӧрастареныт. Ончымо залыште 356 еҥлан вер лиеш. Концерт зал деч посна репетицийлан кумда пӧлем-влак улыт. Чыла вере тачысе илышлан келшыше тул да йӱк оборудованийым йӧнештарыме.