Элыштына 7 тӱжемат 300 школым капитально олмыктыман

                  Капитально олмыкташ палемдыме Российысе шым тӱжем школ радамыш республикысе школ- влакат пурен кертыт. Российын Президентше Владимир Путинын кӱштымыж почеш 2026-шо ий марте шым тӱжемат 300 элысе школ капитально олмыкталтшаш. Тидын нерген теҥгече Правительство комиссий президиумын заседанийыштыже Россий Правительство председательын алмаштышыже Марат Хуснуллин ойлен. Видеоконференцкыл йӧн дене эртыше заседанийыште Марий Элым вуйлатыше Александр Евстифеев участвоватлен. Президент тӱжемат 300 деч шагал огыл у школым чоҥаш, 7 тӱжемат 300 школым капитально олмыкташ кӱштен,- каласен Вице- премьер. Марий Элыште 2022-шо ий марте «Туныктымашым вияҥдымаш» кугыжаныш программе кышкарыште школлам тӱзландараш федерал бюджет гыч 2020-шо ийлан софинансирований семын 249 миллион утлам, 2021-ше ийлан 445 миллион утла теҥге субсидийым пеҥгыдемдыме. Тений республикысе 27 школышто капитально олмыктымо сомылым шуктымо. Президентын кӱштымыжым шуктымо кышкарыште туныктыш министерстве школ- влакым капитально олмыкташ улшо кӱлешлык нерген Россий просвещений министерствыш йодмашым колтен.

Прошлые выпуски