Черетан гуманитар полышым чумырымо

             Ленин лӱмеш тӱвыра полатыште ДНР ден ЛНР калыклан черетан гуманитар полышым погымо. Погымо пунктышто кече еда кочкыш сатум, гигиенылык сатум да моло кӱлешаным погат. Тӱвыра полатын пашаеҥже- влакын мутышт почеш, икмыняр самырык рвезе йоча кочкышым оптыман кугу яшлык- влакым конденыт. А 83 ияш ӱдырамаш кок мешакыш оптымо 20 килограмм ложашым конден. Мешак ӱмбалан шке кид дене возен шындыме: руш салтак- влаклан вуем савем. Поро кумылан еҥ организаций- влакын еҥышт тыгак шӱрашым, макароным, тушенкым, консервым, кампетым, печеньым, вӱдым да шуко молымат конденыт. Ола администрацийын увертарымыже почеш погымо полышым лишыл жапыште Донецк да Луганск калык республикылаште илыше- влаклан колтат.
           Фото: Йошкар-Ола администраций.