"Авангард" туныкта

Марий Элын вуйлатышыже Александр Евстифеев Россий обороно министрын эртарыме селектор погынымшкыже ушнен. Мутланымаш регионлаште самырык тукымым военно-патриотический шӱлышеш шуарыше тунемме да методика рӱдер-влакын пашашт нерген лийын. Марий Элыште тыгай тӧнежлан Куяр посёлкышто верланыше «Авангард» рӱдер шотлалтеш. Тушто 10-шо классслаште да техникум ден училищылаште тунемше-влаклан 5 кечаш тунемме сборым эртарат, салтак илыш дене палымым ыштат. Тений 18 сбор лийын. Тушко тӱжем 100 утла рвезе ушнен. Тиде тунемме ийыште чылаже 3 тӱжем наре самырык еҥ тыгай сборым эртышаш. Тиддеч посна «Авангардыште» военно-патриотический да профильный смена-влакым эртарат, военно-патриотический клуб да юнармеец-влак дене пашам ыштат. Занятийым эртараш кабинетлашке кӱлеш аппаратура ден наглядный пособийым йӧнештарыме. Тиде ийын «Авангард» рӱдерын базыже кумдаҥшаш. Тушто нелылык полосам, волейбол ден баскетбл площадкым ыштат, стадионым уэмдат, турникым, тренажерым да кап-кылым шуараш полшышо моло оборудованийым налыт.