Эше ик гана ковид нерген

Марий Элым вуйлатыше Александр Евстифеев у коронавирус инфекций шарлыме да тудым вес кундемла гыч кондымо шотышто федерал оперштабын погынымашкыже ушнен. Тудым Россий Правительстве председатель вуйлатышын алмаштышыже Татьяна Голикова эртарен. Тушто тачысе кечын элыштына ковид шотышто сӱрет могай улмым каҥашеныт. Май пайрем кече-влак деч вара республикыштына коронавирус дене черланымаш изиш кугемын. Эмлымверышке логалше-влакын чотыштат кушкын. 13-шо майлан Марий Элысе 7 эмлымверыште ковид дене черланыше-влаклан 370 вер уло. Кызыт 34 процентше яра. 56 еҥын чер нелын эрта. ИВЛ апппарат полшымо дене 14 еҥ шӱла. Мӧҥгыштӧ эмлалтше-влаклан эмым ситарат, врач-влак тазалыкыштым терген шогат, телефон дене йыҥгыртен, умылкалат. 13-шо майлан республикышке 62 тӱжем 830 доза вакцина пурен. Медицина организацийлаште прививкым ыштыме 110 пункт уло. 64 мобильный бригада пашам ышта. Теҥгечысе кечылан вакцинын икымше компонентше дене 51 тӱжем утла еҥ вакцинацийым эртен. Кок компонентге прививкым 40 тӱжем 700 наре еҥ ыштен.