Александр Евстифеев рӱлӧ оласе Водоканалын паша лектышыжым палемден

                       Марий Элым вуйлатыше Александр Евстифеев Йошкар-Оласе «Водоканал» МУП-ын директоржо Рафаиль Киямов дене пашаче вашлиймашым эртарен. Мутланымашын тӱҥ темыже ик эн кӱлешан предприятийын кодшо ийысе пашаже да тудым вияҥдыме план нерген лийын. Республикым вуйлатыше предприятийыште пытартыш жапыште лийше сай вашталтыш- влакым палемден. Рафаиль Киямов пандемий жапысе паша нерген ойлен. Тӱрысынек законодательствын да Роспотребнадзор виктемын йодмыжым шуктен толмо. Тидыже коллективым пашам ыштен кертшым арален кодымо, производство, техник, экономик показательым тичмаш шуктымо да парышымат налме,- каласен «Водоканалым» вуйлатыше. Тиде предприятий рӱдӧ олалан вӱдым ситарыше ик предприятий гына. Тушто 775 еҥ пашам ышта. Нуно 440 меҥге кужыт вӱд пучым обслуживатлат. Тудыжо 40 процентлан тоштемын. Тений тоштемше сетьым уэмдыме пашам писемден колташ лийме, вӱдым йомдарымым шагалемдыме мера- влак ышталтыт. Проблемный ужашлан канализаций сетьын тоштеммыже шотлалтеш. Тудым кок тӱжем метрым олмыктымо. Очистной сооруженийым шотыш кондаш кодшо ийын 15 миллион наре теҥге оксам пыштыме. Йошкынжо вигак каръерыш наҥгаялтеш. Сандене олашке пуш ок шарле. Сооруженийын кокымшо йыжыҥжым чоҥымо шотышто Москва дене мутланымаш кая. Предприятийын материально- технический базыжым вияҥдыме нергенат ойлымо.