Марий подкогыльо презентацийым эртен

                      Йошкар-Олаште Марий подкогыльылан калыкле бренд семын презентацийым ыштыме. Теҥгече «Леве эҥер» трактирыште у калыкле бренд дене кумдан палдареныт. Ынде Марий Элын гастрономий картыштыже курык марий кравец да «Шернур легенда» сыр деч посна марий подкогылят уло. Трактирын озаже Иван Антроповын мутшо почеш, патентым налме процедура 2018-ше ийыштак тӱҥалын. Ынде официально доказатлыме- подкогыльо, чынжымак, марий калыкле кочкышлан шотлалтеш. Тудо пельмень, вареник, хинкали да манты деч ойыртемалтеш. Презентацийыште российысе палыме шеф-повар да телевӱдышӧ Илья Лазерсон лийын. Тудат подкогыльо нерген шке шомакшым каласен. Марий Эл Правительство председательын икымше алмаштышыже Михаил Васютин каласен: Федераций Советым вуйлатыше Валентина Матвиенко чыла кундем ончылно задачым шынден: сату знак- влакым нуным ыштен лукмо кундем дене келшышын лӱмден регистрироватлаш кӱлеш. Кӱчык жапыште ме ныл сату знакым регистриоватлышна: кӱслем, кравецым, сырым да подкогыльым. Нуно чынжымак ойыртемалтше улыт. Тиде поснак шижалте Волжскышто бренд- влаклан презентацийым эртарыме годым. Нуно чынжымак калыкын кумылжым савырышт. Тиде пашам ме умбакыжат шуена,- иктешлен Михаил Васютин. А Иван Антропов ешарен: марий подкогыльо калыкле бренд семын гастрономий туризмым вияҥдаш сай шӱкалтыш лиеш.
Фото: https://potokmedia.ru/