9-ше майлан Йошкар-Ола яндар лийшаш

                    Кугу Сеҥымаш  кече вашеш рӱдӧ оланан уремлажым сылнештарат. Луман теле деч вара корным олмыктымо да уремлам эрыктыме паша умбакыже шуйна. Олам 9-ше майлан ямдылыме да кундемлам тӱзландарыме йодышлан Марий Элым вуйлатыше Александр Евстифеевын олан мэрже Евгений Маслов дене эртарыме вашлиймашыже пӧлеклалтын. Олам кузе ямдыледа, Сеҥымашым пайремлыме кечын калыкын кумылжо тудын деч шогаш тӱҥалеш,- каласен республикым вуйлатыше. Кодшо ийын тудо пандемийлан кӧра кусаралтын ыле. Тений 9-ше майыштак палемдалтеш. Мэрын мутшо почеш, лум шуко вочмылан кӧра, коммунал служба жапыштыже чыла ыштен шуктен огыл. 30-шо март гыч эрыктыме месячник тӱҥалын, икымше субботник эртыш, кум тӱжем наре еҥ уремыш лектын, 40 технике 600 кубометр утла шӱкшакым луктын. Паша умбакыже шуйна. Вес субботник 24-ше апрельыште лийшаш. Марий Элым вуйлатыше олаште илыме верым чоҥышаш кумдык- влакым ямдылыме нергенат ойлен. Кодшо ийын илыме верым план деч шукырак ыштыме. Теният график почеш каена, илыме верым чоҥымо графикым иземдыман огыл, - каласен глава. Илыме вер дене пырля социал инфраструктуро объект- влакымат мондаш ок кӱл,- ешарен тудо.