Майыштат У ий семын канена
Таче Российын Президентше Владимир Путин майысе кок пайрем кокласе кече-влакым каныш кече семын увертарен. Роспотребнадзор виктемым вуйлатыше Анна Попова коронавируслан кӧра Президентлан май пайрем- влакым кӱрылтдымым ышташ темлен. Тудын мутшо почеш, пайрем коклаште кӱрылтыш улмылан кӧра калыклан тӱшка транспортышто утларак кошташ верештеш: ола деч ӧрдыжкӧ каяш да толаш, вара адак каяш да толаш, тыге черланен кертме лӱдыкшӧ кугемеш. Владимир Путин тиде ой дене келшен.