Йошкар-Оласе Дружба урем мартеат черет шуын

Йошкар-Оласе Дружба уремым олмыкташ тӱҥалме. Муниципал конракт почеш подрядчик Анциферов урем деч Санчурск корно марте ужашым олмыкта. Тиде паша «Лӱдыкшыдымӧ да сай качестван автомобиль корно- влак» калыкле проект кышкарыште шукталтеш. Пашам сентябрь марте ыштен шукташ сӧрат. Пытартыш гана тушто асфальтым 2017-ше ийыште вашталтыме ыле. Пашам Машиностроитель деч Анциферов урем марте ужашыште шуктымо. Тиде уремын историйже 1957-ше ий гыч тӱҥалеш. Тунам тудо Берёзово ден Гомзово ял- влакым ушен шогышо корно лийын. Варарак, ола шарлаш тӱҥалмеке, тиде кумдыкым илыме верым чоҥаш пуымо.