Руш йылме дене ЕГЭ гыч кок еҥым луктын колтеныт
ЕГЭ-м эртарыме радамым пудыртымылан кок выпускникым руш йылме дене экзамен гыч луктын колтымо. Республикыштына школым тунем пытарыше- влак эн шукын руш йылме дене шинчымашым тергеныт. Тудо кок кече эртен. Технике, организаций шотышто ситыдымашым палемдыме огыл, санитар-эпидемиологий йодмашым тӱрыс шуктымо. Экзаменыш 97 процент ӱдыр-рвезе толын. 6-шо июльышто эртыше экзаменын лектышыже 20-шо июль марте, 7 июльышто лийше тергымашын лектышышже 23-шо июль марте пале лийшаш. Ик гана веле огыл шижтарыме гынат, кок выпускник ЕГЭ-м эртарыме радамым пудыртен да нуным экзамен гыч луктын колтымо. Ынде математике дене черетан экзамен 10-шо июльышто лийшаш. Тушко кок тӱжемат 16 еҥ возалтын. Туныктыш министерствын ончыктымыж почеш, тений ЕГЭ обязательный огыл. Тудым кӱшыл шинчымашым налаш шонышо- влак тунемаш пураш кӱлешан предмет дене гына кучат.