Кушто кушташ палаш кӱлеш

Еҥын машинаже ӱмбалне куштымаш тюрьма марте шуктен кертеш. Йошкар-Олаште илыше 37 ияш ӱдырамаш еҥ погылан эҥгекым ыштымылан титаклалтеш. МВД-н пресс-службыжын увертарымыж почеш, майыште кастене Ураев бульварыште йӱшӧ ӱдырамаш шогалтен кодымо Ниссан икс-трейл автомобильым ужын. Тудын ӱмбакыже кӱзен да кушташ тӱҥалын. Чыла тидым машина озан пелашыже окна гыч ужын. Куржын лектын, куштызым шӱдырен волтен да полиций пашаеҥ- влак толмеш колтен огыл. Машинан капотыштыжо, леведышыштыже да бамперыште коркалалтше  пале- влакым рашемдыме. Эҥгекым 19 тӱжем теҥге марте аклыме. Пашам судыш колтымо. Кушташ йӧратышым вич ий марте эрык деч посна коден кертыт.