Оласе уремлаште лакылам умбакыже тӧрлат
Оласе уремлаште лакылам умбакыже тӧрлат. Йӱштӧ-юалге годым тыгай пашам чот кулешан голым гына, изирак лаке кугу коремыш ынже савырне манын, ыштат. Молан манаш гын, нуно кугу ДТП-шке шуктен кертыт. Тыгай пашалан корным олмыктышо- влак велыман асфальтым кучылтыт. Тудым юалгыштат опташ лиеш. Но изи шелше- влакым тыгай йӧн дене олмыкташ шотлан ок тол. Асфальт сайын пижын ок керт да вашке тӧргалтеш. Сандене тудыжым келшыше игече толмеке ышташ тӱҥалыт. Кодшо кечылаште велыман асфальт дене Тӱҥ кӱварыште, Чавайн бульварыште, олан вес могыр ужашыштыже олмыктымо, кум тонн наре смесьым кучылтмо. Пашам Вознесенский ден Эшкинин уремлаште шуйымо. Тушто 7 тонн утла асфальтым оптымо.